Outramente...

Xornal de Galicia tivo o privilexio de contar entre as súas firmas cunha líder de opinión de indiscutible nivel argumentativo. A chegada da profesora Pilar García Negro aXornal de Galicia impregnou -aínda máis- as páxinas do diario de paixón pola defensa da lingua propia de Galicia a través de argumentos e razoamentos consistentes, pero tamén a través de sentimentos de pertenza a un país, a unha lingua, a uns símbolos e a uns referentes históricos.

  Os lectores de Xornal... adoitaron recibir os artigos desta analista con complexos debates, xa que os temas elexidos, entre eles todo o relativo á defensa do noso idioma e o que representa, e, sobre todo, a argumentación exposta para defender as súas posicións, non deixaron indiferentes a ninguén. García Negro sostén que a lingua é "o ben máis democrático que posuímos: a lingua de noso, a que nos configurou e nos construíu, mesmo en contra da nosa vontade".